Rawit-dawit

Kun pa’nong an puso
biyong kinukulit,
o an bilog na kalag
garo baga mapapa’kit,
o an lipot kan banggi
kun pa’nong pinapainit
kan lanit na dara
ka paghapot sa langit:
na ano daw an rawit-dawit?

Asin an hapot sisimbagon
nin mahibog na ambon:

arog baga na
kun pa’nong an kalag
nagkakahawak,
o an tubig sa langit
inuuran, minatipwak,
nagpapaontok
sa harak-hatak
kan mga aki sa tinampong
dati mainit, nagagatak
naglilitik, nababaak
arog kan makusog na duros
kan bukid
pagtu’mak sa kadagaan
kan pagkahapon.

Daing linaw
siring sa tubig kan salog
lambang tag-uran
an kasimbagan.