Friday, March 16, 2007

An Tikwí





The Windhover by Gerard Manley Hopkins SJ

Ki Kristo satong Kagurangnán

Náhiling ko iníng minabílog na parasúnod kan pagkaága, kaha-
dean kan matuá kan sírang-saldáng, Tikwíng ikinúrit kan burík-butíkan na maagahón, sa saíyang
Paglataw-látaw sa kahiwasán sa irárom kan tuninóng niyang dúros, asin an pagsakát pa
Dumán sa kalangkawán, kun pâno siyang minarekúdo sa pagtagilíd kan pakpák
Sa saíyang kaogmáhan! asin lupád, lupád pa sa saróng kampáy,
Síring sa boól na malúmoy na mináhalnas pag minasíkô; an tabyón asin paglupád
Sinabát an bûsóg na dúros. An nagtátago kong púsô
Naúkag húli sa saróng gamgám,—an nagúnô niya, an kaoragán niya man saná!

Daíng dahilán na gayón asin kusóg asin gíbo, ay, dúros, ónra, plúma, úya
Minapakúmbabâ! ASIN an kaláyong minagíkan saímo, kadákol na panahón pang
Sásambiton na oróg pang magayón, oróg na peligróso. Ay sakóng kabalyéro!

Daíng pagngalás: minsán an taisán mináhaman sa asyáb na labi-lábing
Mag-kintáb, asin sa mga .pínong asúl na silyáb, ay namómotan ko,
na nahuhúlog, liwát na nagkákabarangá, asin minápabahâ nin mapula-puláng buláwan.

0 saw it: