Kitá, síring sa mga tren, mga lunadán nin pagkámoot

ki M

minairárom kitá, mapagkúmbabâ,
sa mga kadlagán kun saín dai namámansayan
alágad nahíhiling an padúdumanan;
minadalágan sa mga abága kan kabukídan,
bontól sa mga rekúdo nin pagsákit, minamatè
an gabát kan goyód-goyód na pagláom,
asin minákaskas sa darusdós, kun saín
sinásabat kita nin malípot na dóros, pasabóng
sa pagraní sa namómôtan;
dai ta hiníhiling an mga siyudad o sítyo
asin óontokan an lambáng estasyón
húli ta an gabós minámakulugan;
nakákabungog an silbáto, síring sa makusóg
na dagubdób kan daghán, tangáning
daíng makulgán o abtán nin kagadánan.

Síring kitá sa mga tren,
mga lunadán nin pagkámoot ---

minalúnad kitáng igwáng pagkadayúpot
sa namómôtan, síring na dayúpot an mga ruwéda
sa mga ríles na dai man lámang niya namatéan
nin lípot minsán sa kataháwan kan tag-urán;
minalúnad kitá na igwáng dakúlang pagkámoot,
pagkámoot na minapúkaw sa mga bara-banwaán,
sa túrog na mga haróng, asin minápoon
sa bâgong aldáw.

Síring kitá sa mga tren,
mga lunadán nin pagkámoot ---

kasubâgóng pagkaága,
minâwot kong mágduman sa estasyón,
sa kinatûdán na lulunádan,
daíng táo, daíng ribók,
nátadâ na saná an paísing
kasubanggí palán iyó na an
húring biyáhe kan mga tren.