Sunday, July 27, 2008

OPM?






NAKALIGTAS AKO sa kakulangan nin paghangos pagkababâ ko sa jeep. Näomáyan sa pagkäuyam sa labà kan biyahe, bako huli sa trapik, kundi huli sa tugtog sa laog kan nasakyan na jeep na hale sa sarong FM station sa Manila. Poon Edsa-Shaw sagkod Kalentong, garo paliwat-liwat na pinapalagatob an daghan ko kan kusog kan ritmo nin electronic drums na naghahale sa loud—very very loud—speakers kan jeep. An orog na nakakabaldê iyo na sa likod kan lagatob na ini, yaon an maluyang tugtog kan nagkakapirang mga dinakulaan na mga awit, mga nakaayon sa inaapod na klasikong Original Pilipino Music.

Naglalagatob na an musika kan ako magsakay. Inabútan kong nagtutugtog an ‘Can’t We Start Over Again’ ni Jose Mari Chan. Dinakulaan ko an awit na ini. Naroromdoman ko kun pano nagkagarasgas an bála kan album na ‘Constant Change’ ni Jomari Chan sa casette player mi kaidto, nasa elementary pa ako. Alagad ngunyan orog na makapungaw kun madadangog ta na sana ini sa bersyon na inaapod na remix kun sain ini klase nin remix na an epekto iyo an hayagan na pagratak sa mga awit na sa sadit nindang paagi nakatabang sa pagbilog kan kontemporanyong musikang Filipino.

Sunod na nag-segué an awit na ‘Closer You and I’ ni Gino Padilla. Alagad bago an awit pinasakalyehan nguna ini nin edited na transition kan ‘Can’t We Start Over Again’ kun sain paliwat-liwat na kinanta ni Jomari Chan an linyang “can’t we start... can’t we start... can’t we start over again...” kasabay an sarong siwit na garo naghuhulog nin bomba sa mga pelikulang giyera. Nagtapos an ‘Closer You and I’ siring man, sa paliwat-liwat na pagsambit ni Gino Padilla kan “we’ll be together... we’ll be together... we’ll be together... you and I.” Pawatara baya.

Nagsunod an saro sa mga enot na awit ni Jamie Rivera. Lingaw ako kan titulo, alagad romdom ko ini bilang house music kan kataid ming klase kan ako nasa Grade 5 sa Lupi Central School. Ito si kanta na pag pinakanta si saro sa mga estudyante duman, ito an kakantahon niya. Nostalgia kuta si dapat na pagmate para sako. Alagad natambunan ini kan ritmo kan electronic drums.

Nagsunod an ‘Everlasting Love’ kan The Company. Kan nadangog ko si bersyon sa jeep, nawara bigla si uyam ko sa bersyon kaini ni Rica Peralejo. Biglang naging less complicated an bersyon ni Rica. Saro ini sa mga signature songs kan The Company, saro sa mga nagpabantog sainda. Inda ko kun anong sasabihon ni Moy Ortiz kun nadangog niya si bersyon.

Medyo bago pa an “Kailangan Ko’y Ikaw” ni Ogie Alcasid, asin bako man akong fan kan nasabing kanta, nanghinayang ako na garo baga ini dai pinaglanganan kan siisay man na naglapat kan percussion na sa hiling niya marahay-rahay. Nagsunod an saro pang Jomari Chan song, an ‘Please Be Careful With My Heart’ na sa hiling ko saro sa mga awit kun sain marhay pang performer si Regine Velasquez—patawad sa mga fans niya—huli ta dai pa digdi pinipirit an boses niya na magbirit. Alagad, okay na si Regine, kisa sa ‘Please Be Careful With My Heart’ na igwang kasabay na nakakabongog na drums.

Pagbaba ko sa may Kalentong, ‘Ligaw-Tingin’ ni Sheryl Cruz ang nagtutugtog. Sayang. Saro man ini sa mga awit na nadadangog ko mantang papuli ako hali sa eskwela pagkaodto kan elementary pa ako.

Ano na baya nanggad an nangyari sa musikang Filipino? Gururang na sana an mga miyembro kan APO Hiking Society na saro sa mga nangongorog na para-tulod kaini. Bihira na, kun bako man na mayo na, sinda Mitch Valdez asin Nanette Inventor sa industriya. Si Ryan Cayabyab na sana asin nagkakapirang parakanta asin musikong Filipino an nagmamakulog sa kagayonan kan satong mga popular na awit.

Siring na kaini an nangayari asin kun dai man kita magigin sensible sa mga ginigibong pagbabago sa dalagan kan musikang Filipino, tibaad padagos na ining mawaran nin sadiring identity. Maski digdi sa Bikol, an satong mga radyo na minapatugtog kan mga awit na siring kan mga nasambit ko, kaipuhan man gayod na magin likay sa mga remixes asin mga editions na ginigibo ninda sa mga kanta. Igalang man an kompositor asin an orihinal na paraaawit.

Tibaad an enot na kaipuhan tang gibohon asin rimposon sa satong mga daghan iyo an mensahe ni Ryan Cayabyab na ‘Kayganda ng Ating Musika.’

0 saw it: