Wednesday, July 09, 2008

Pag-abót ni Fray Juán de la Hos sa Lupí, 1701






Nápaturog sindang mga énot
na dáyong nápadigdi sa Lupí,
húli man sa tabyón kan baróto.

Pagmuklát kan saindáng mga mata, nagsírang
an lanób kan kinâban—bérdeng kadlagán
na nagsarà sa nakákasílaw na saldáng,

asín sindá nag-aráng kasabáy kan burâ
kan mga gamgám sa daíng digtáng
kalangítan. Sininyasán nindá

an pilóto na rikasán an pagsagwán
sa paghonà na úya na digdí an totóong bulawan.
Por Diós y por Sántos, ta sa pagrekúdo

kan baróto sa nagsísirilyab na sulóg
kan sálog, abáng gagáyon na mga linaláng
an saindá liwát nagpa-aráng—

mga áking nagkakaráwat sa túbig,
mga babáeng maogmáng nararalabá,
mga laláking tunínong na nagsísirâ.

Kaidtó saná nagpoón mabasâ an gáyad
kan saindáng malulumhók na abíto—
malípot an túbig, asín an sulóg makusóg.

Mga dóot sa pangpáng saná an mga saksí:
mga lupís na matatárom na nagturúsok
sa saindáng mga daghán, asín dai na sindá pinaháli.

0 saw it: